男：

Laaisnauz goy miz ruangh mengz nuangx，
以为　哥　不　想　你　妹

以为哥哥不想妹，

Laaisnauz bix miz ruangh mengz menl.
以为　哥　不　想　你　妹

以为哥哥不想你。

Ruangh mengz bail rih daic xos rih，
想　你　去　地　哭　放　地

想你去种地也哭，

Bail naz daic xos naz.
去　田　哭　放　田

去种田也哭。

Bail rih daic gogt haz，
去　地　哭　根脚　茅草

在地里茅草脚哭，

Bail naz daic gogt fonh，
去　田　哭　根脚　丛

在田里树丛下哭，

Daic gogt fonh xiexmaail.
哭　根脚　丛　野染米花

在野染米花丛中哭。

Feax xih daic wenz daail，
别人　呢　哭　人　死

别人哭死人，

Gah gvaail daic wenz lix.
只有　我　哭　人　活

只有我哭活人。

Daic duez nuangxdalmbail，
哭　个　情妹妹

哭个情妹妹，

Ramxdal lail guehnaaus.
眼泪　流　一直

眼泪流不停。

Hamhneex ndaix xonz haaus leg feax dauxsaml，
今晚　得　句　话　子女　别人　安慰

今晚得妹话来安慰，

Ramxdal xaml dol noih，
眼泪　沉　多　少

眼泪干许多，

Deel seeuc rongz dol noih.
它　少　下　多　少

泪少流许多。

女：

Nuangx xih ruangh mengz bail haucjeex，
妹　呢　想念　你　去　赶场

妹想你就去赶场，

Ruangh mengz bail hauchel.
想念　你　去　赶集

想你就去赶街。

Nuangx ye deems jeexsadt haangh lauc，
妹　也　等　戌场　摊　酒

妹在酒摊上等待，

Deems jeexmauc haangh bangz.
等　卯场　摊　布

在布摊上等待。

Miz ranl mengz ye ruangh，
不　见　你　也　愁

看不见你就心焦，

Miz ranl bix ye ruangh.
不　见　哥　也　愁

看不见哥就心焦。

Mengz doc bas xih nauz ruangh nuangx，
你　都　嘴上　就　说　想念　妹

你嘴上说想妹，

Bas xih nauz ruangh menl.
嘴上就　说　想　我

嘴上说想我。

Ndees mengz ruangh gec bux dangclaez？
不知　你　想　那　个　什么

不知你想的是谁？

Nauz haec gul el xoh，
说　给　我　背　名

说给我背名，

Nauz haec nuangx el xoh.
说　给　妹　背　名

说给妹背名。

Ndees mengz ruangh rih laez ruangh naz？
不知　你　想　地　还是　想　田

不知你想地还是想田？

Laaul mengz ruangh duezbyal ndael mbos.
怕　你　想　鱼儿　里　井

怕你想井里的鱼儿。

Ndees mengz ruangh bux mos laez ruangh bux raanz？
不知　你　想念　个　新　还是　你　个　家

不知你想新欢想旧爱？

Mal nauz jiej xizlaanl el xoh，
来　说　姐　娃娃　背　名

说给妹背名，

Mal nauz jiejsaaml feax el xoh.
来　说　三姐　别人　背　名

说给我背名。

Diangl ye buxndeeul bas，
瓜　也　一个　切

瓜是一个切，

Mas ye buxndeeul genl.
果　也　一个　吃

果是一个吃。

Dez mal xuicdalmenz el xoh，
带　来　情妹妹　背　名

拿妹来背名，

Dez mal leglunz feax el xoh.
带　来　幺姑娘　别人　背　名

拿我来背名。

男：

Laaisnauz goy miz ruangh mengz nuangx，
以为　哥　不　想　你　妹

以为哥不想你，

Laaisnauz bix miz ruangh mengz menl.
以为　哥　不　想　你　你

以为哥不想妹。

Ruangh mengz haux mizgenl ndianlxadt，
想　你　饭　不吃　七月

七月想你不吃饭，

Nad miz genl ndianlsis.
粒　不　吃　四月

四月不吃一粒米。

Nad haaux mbis gueh soongl，
粒　饭　分　做　两

饭粒分成二，

Nad haaux mbis gueh saaml.
粒　饭　分　做　三

饭粒分成三。

Goy soh byaaic gongzgaangz riangz ruangh，
哥　直接　走　蹒跚　和　想

哥为你走路蹒跚，

Gul byaaic xuanx riangz ruangh.
我　走　倒　和　想

我为你走不稳。

Ruangh mengz deems jeexsadt miz dauc，
想　你　等　戌场　不　来

想你到场上不见，

Deems jeexmauc miz dangz.
等　卯场　不　到

在场上等不来。

Laaul mengz degt byalbangz yueh goy，
怕　你　打　白条鱼　骗　哥

怕是你打白条鱼骗哥，

Yamz byaljaaic yueh goy.
杀　鲇鱼　骗　哥

杀鲇鱼骗哥。

女：

Laaisnauz nuangx miz ruangh mengz bix，
以为　妹　不　想　你　哥

以为妹不想哥，

Laaisnauz nuangx miz ruangh mengz menl.
以为　妹　不　想　你　你

以为妹不想你。

Soongl dinl diab gol mungz miz lamx，
两　脚　踩　棵　野芋头　不　倒

两脚踩野芋头不倒，

Soongl dinl diab hongz ramx miz weas.
两　脚　踩　塘　水　不　浑

双脚踩水塘水不浑。

Dancbeah lumz xoonl jeenl，
穿衣　忘记　穿　衣袖

穿衣忘记穿衣袖，

qif gveeuc doongh doc lix bux ruz.
旗　缠　竿　都　有　人　解

旗缠竿都有人解。

Nagt gul fuz lumc gvaaus，
想　我　浮　像　洪渣

想我浮像洪渣，

Gvaaus jiangs ngox lail roongz，
洪渣　和　芦苇　流　山洪

洪渣顺着山洪流，

Goongl sez faix bod rah.
倒　如　树　脱　根

倒如树脱根。

Faix bod rah doc lix jiez dies，
树　脱　根　都　有地方　放

树脱根都有地方放，

Faix bod rah doc lix jiez ingl.
树　脱　根　都　有　地方　靠

树脱根都有地方靠。

Gul xih neh dangz xuicdalmenz dangz xeeuh，
我　（助）　想　到　情哥哥　到　辈子

我一辈子都想你，

Neh dangz goysaaml feax dangz xeeuh.
想　到　三哥　别人　到　辈子

我一辈子都想哥。

男：

Laaisnauz goy miz ruangh mengz nuangx，
以为　哥　不　想　你　妹

以为哥不想妹，

Laaisnauz bix miz ruangh mengz menl.
以为　哥　不　想　你　你

以为哥不想你。

Mengz laez bas nauz nagt nauz nagt，
你　也　嘴上说　想　说　想

你嘴上说想啊想，

Nagt sez jis eeml rauz.
想　如　枝　小芭茅大芭茅

想我轻如芭茅枝。

Goy xih bas nauz mbaul nauz mbaul，
哥　也　嘴上　说　轻　说　轻

哥嘴上说不想不想，

Mbaul sez gunc rinlmeah，
重　如　捆　磨石

想你重如那磨石，

Gunc rinlmeah nauz mbaul.
捆　石磨　说　轻

石磨小说是轻。

Laaisnauz jis eeml rauz nagt hingh，
以为　枝小芭茅大芭茅　重　些

以为芭茅叶大就重，

Laaisnauz yaangz eeml ngox nagt hingh.
以为　穗　茅草芦苇　重　些

以为芦苇草更重。

女：

Laaisnauz nuangx miz ruangh mengz no，
以为　情妹　不　想　你　喏

以为妹不想你啊，

Nagt seeuc miz lail lumc ramx，
想　差　不　流　像　水

想你像水流不停，

Seeuc miz bamh lumc rinl.
差　不　矮小　像　石

想你像石头很高。

Mengz laez bas daaml bas nauz nuangx miz nagt，
你　也　嘴　又　嘴　说　妹　不　想

你一遍一遍说妹不想，

Mal rauz yag rinlrees，
来　咱　提　沙石

咱来提沙子，

Mal rauz jees rinl haaul.
来　咱　数　石　白

咱来数石头。

Mal rauz raaul gal xaaih，
来　咱　量　条　海洋

咱来量大海，

Gal xaaih dinc dungz dinc，
条　海洋　短　同　短

大海短就短，

Gal xaaih raiz dungz raiz.
条　海洋　长　同　长

大海深就深。

Xaznauz gal xaaih deel rox raiz，
如果　条　海洋　它　会　长

如果大海深，

Jaiz saauh gul xih ies，
想　像　我　就　算

想得如我那样深，

Nagt saauh nuangx xih ies.
想　像　妹　就　算

想得像妹那般深。

Goy ye bas nauz nagt nauz nagt，
哥　也　嘴　说　想　说　想

哥嘴上说想啊想，

Nagt nuangx xos jaangh gumh onlnyaanz.
想　妹　放　中　丛　阎王刺

把妹放在刺丛中。

Nagt nuangx xos jaangl damz riangz nah，
想　妹　放　中　塘　跟　水獭

放到塘里跟水獭住，

Nagt nuangx xos jaangl dah riangz byal，
想　妹　放　中　河　跟　鱼

放到河里跟鱼儿游，

Nagt menl xos jaangl naz riangz yeeuh.
想　妹　放　中　田　跟　鹰

放到田里跟老鹰飞。

Byal doc lix ramx leeuh，
鱼　都　有　水　游

鱼儿有水游，

Yeeuh doc lix fead mbinl.
鹰　都　有　翅　飞

老鹰有翅飞。

Mengz nagt jiml xih yueh，
你　想　我　就　骗

你想我是假，

Menl nagt nuangx xih yueh.
你　想　妹　就　骗

你想妹是骗。

Is mengz yueh xih yueh gusxaux，
如果　你　骗　就　骗　以前

你若要骗就早骗，

Mbaux xih mbaux gus naanz.
不　就　不　时　久

要分就早分手。

Baizneex gaangc dangz jaangl haz yueh，
这时　说　到　中　要　骗

现在说到一半要骗，

Dangz jaangldangx haz yueh.
到　中间　要　骗

到一半要骗。

Yueh nuangx woicros miz aul raaiz，
骗　妹　牵线　不　要　绾

骗我牵线不用绾，

Xingl waaiz mizaul xah.
牵　水牛　不要　绳

牵牛不用绳。

Nac mengz yueh Buxhas jaangljeex，
不如　你　骗　汉族　场坝

不如你骗街上人，

Yueh Buxlox jaanglhel.
骗　闲人　场坝

骗场坝上的闲人。

Ranl gul fuz xih yueh，
见　我　浮　就　骗

见我单身就骗，

Ranl rauz uangx xih yueh.
见　我　愁　就　骗

见我愁就骗。

男：

Nuangx a，
妹啊

妹啊，

Laaisnauz bix miz nagt mengz no，
以为　哥　不　想　你　喏

以为阿哥不想你啊，

Goy ye nagt mengz nagt saauh rinl.
哥　也　想　你　想　像　石

哥想你想如石头重。

Nagt jiml nagt saauh qyuangx，
想　你　想　像　巨岩

想你想如重岩石，

Nagt saauh qyuangx jaanglnaz.
想　像　巨岩　田中

重如在田中巨岩。

Nagt saauh rauz xih ies，
想　像　我　就　算

像我这般想就行，

Jaiz saauh bix xih ies.
想　像　哥　就　算

像哥这般想就好。

女：

Goy ye laaisnauz nuangx miz nagt，
哥　也　以为　妹　不　想

哥以为妹不想，

Gul ye neh mengz banz lumcbux neh xeenz，
我　也　想　你　成　好像　想　钱

想你重如金，

Neh mengz lumcbux neh nganz.
想　你　好像　想　银

想你重如银。

Ruangh mengz banz lumcbux banzbah，
思念　你　成　好像　发疯

想你就像发了疯，

Dieymay gvas reegtjaec doc nuangx mizrox，
爹妈　过　旁边　都　妹　不知

爹妈走过也不知，

Bixnuangx gvas reegtjaec doc nuangx mizranl.
亲友　过　旁边　都　妹　不见

亲友走过也不见。

Saml nagt mengz buxdoh，
心　想　你　一个

心想你一个，

Saml nagt bix buxdoh.
心　想　哥　一个

心恋哥一人。

男：

Nuangx a，
妹啊

妹啊，

Nagt rauz siams nagt rauz，
想　我　就　想　我

想我就想我，

Geaznyungh mbaul yiangh waais，
不要　轻　如　棉

不要轻如棉，

Geaznyungh aais yiangh rumz.
不要　淡　如　风

不要淡如风。

Nagt gul sez ramxdah，
想　我　像　河水

想我像河水流不停，

Goy ye bas haz gaangc xos nuangx laaul miz yag，
哥　也　嘴上要　讲　向　妹　怕　不　理

我想跟妹搭话怕不理，

Bas haz gaangc xos nuangx laaul miz yaaiz.
嘴上要　讲　向　妹　怕　不　理睬

想跟妹搭话怕不睬。

Mengz ye jaiz rauz laail rox ragt，
你　也　想　我　多　会　断

你想我多了会断，

Nagt rauz laail rox aais.
想　我　多　会　淡

想多了会淡。

Leens yiangh byaaic mengz yaez，
看　样子　走　你　算

看你走路的样子，

Geaznyungz gaangc xonz ndael xonz roh.
不要　讲　句　里　句　外

不要话里话外不一样。

Goy ye neh haz gaangc xos mengz laaul miz os，
哥　也　想　要　讲　向　你　怕　不　出

哥想跟你说话怕说不出，

Laaul bohmeeh nuangx miz yungz.
怕　父母　妹　不　准

怕你爹和妈不准。

Gul haz gaangc xos xuicdalmenz ye gaanh，
我　要　讲　向　情妹妹　也　缺

我要跟你说话也难，

Gaangc xos leglunz feax ye gaanh.
讲　向　幺姑娘　别人　也　缺

跟情妹说话也难。

Laaisnauz goy miz nagt，
以为　哥　不　想

以为哥不想，

Goy ye nagt mengz xos jisrod，
哥　也　想　你　放　金竹枝

把你放在竹梢上，

Laaul jisrod neengz ngvaaih.
怕　金竹枝　梢　摇摆

生怕竹梢摇。

Neh haz nagt mengz xos jis ngaaih，
想　要　想　你　放　枝　艾草

把你放在艾枝上，

Laaul jis ngaaih neengz roz.
怕　枝　艾草　梢　枯

又怕艾枝枯。

Nagt mengz xos ndanl bol，
想　你　放　个　坡

把你放山坡，

Laaul ndanl bol neex aanx.
怕　个　坡　这　倒

怕山坡会倒。

Nagt mengz xos jaangl mbaanx，
想　你　放　中　寨

把你放寨中，

Laaul ruizmax mal diab.
怕　马蹄　来　踩

又怕马蹄踩。

Nagt mengz xos xuic riabt，
想　你　放　角　蚊帐

把你放蚊帐，

Laaul gec riabt sis xuic neex doms.
怕　那　蚊帐　四　角　这　垮

又怕蚊帐垮。

Nagt mengz xos jaangl xoongz，
想　你　放　中　桌

把你放桌中，

Xoongz baaiz lauc riangz noh.
桌　摆　酒　和　肉

桌摆酒和肉。

Nagt mengz xos basmbos，
想　你　放　井边

把你放井边，

Ros bail dagt bail daauc ramx miz sianz.
水瓢　去　舀　去　倒　水　不　匀

水瓢舀水不均匀。

Nagt mengz xos roonghndianl，
想　你　放　月亮

把你放月上，

Ndianl xibhac haz roongh.
月亮　十五　要　亮

十五月要亮。

Nagt mengz xos ndanljoongs，
想　你　放　篮子

把你放篮里，

Jongs buxjees buxlaaux haz dez.
篮子　老人　大人　要　用

篮子老人用。

Nacndaix nagt xos xel xos hoz xih ies，
不如　想　放　心　放　喉　就　算

不如把你放心里，

Jaiz xos dungx xih ies.
想　放　肚　就　算

把你放心间。

女：

Laaisnauz nuangx miz jaiz，
以为　妹　不　想

以为妹不想，

Nuangx doc ruangh mengz nehjaiz dangs haec rog，
妹　都　思念　你　想要　捎　给　鸟儿

我想捎话给鸟儿，

Laaul rog dez bail dongh lac mbaanx genl mas.
怕　鸟儿　带　去　坝子　下　寨　吃　果子

怕鸟带去坝里吃果子。

Ruangh mengz nehjaiz dangs haec nah，
想　你　想要　稍　给　水獭

想捎话给水獭，

Laaul nah dez bail dah lac mbaanx genl byal.
怕　水獭　带　去　河　下　寨　吃　鱼

怕水獭带到河里吃鱼。

Laaisnauz rauz miz ruangh，
以为　咱　不　想

以为我不想，

Laaisnauz nuangx miz ruangh.
以为　妹　不　想

以为妹不想。

Ruangh mengz bail rih daic xos rih，
想　你　去　地里　哭　放　地里

想你种地在地里哭，

Bail naz daic xos naz.
去　田里　哭　放　田里

种田在田里哭。

Bail rih daic gogt haz，
去　地里　哭　根脚　茅草

种地在茅草林哭，

Bail naz daic gogt fonh.
去　田里　哭　根脚　丛

种田在树丛中哭。

Daic gogt fonh xaz nyaul，
哭　根脚　丛　篷　东瓜

在东瓜篷下哭，

Buxlaez daic duez bix dangz jaul lumc ruangh，
谁人　哭　个　兄　到　有　像　妹

谁人像妹一样想哥哥，

Buxlaez daic duez goy dangz lix lumc ruangh.
谁人　哭　个　哥　到　有　像　妹

谁人像我一样哭哥哥。

男：

Mengz laez bas nauz nagt nauz nagt，
你　也　嘴上　说　想　说　想

你嘴说想又想，

Nagt bix xos jaangldah riangz byal.
想　哥　放　河里　跟　鱼

把哥放到河里跟鱼游。

Xos jaanglnaz riangz romh，
放　田里　跟　鹰

放在田里跟鹰飞，

Xos riangz romh byaailxaz.
放　跟　鹰　树梢

放在树梢跟鹰住。

Menl nagt raz xih yueh，
你　想　咱　就　骗

你想我就哄，

Mengz nagt bix xih yueh.
你　想　哥　就　骗

你想哥就骗。

女：

Nuangx doc ndiabt dangz bix，
妹　都　想　到　哥到

妹也想到哥，

Nuangx doc ndiabt dangz menl.
妹　都　想　到　你

妹也想到你。

Soongl dinl diab gol mungz miz lamx，
两　脚　踩　棵　野芋头　不　倒

两脚踩野芋头不倒，

Soongl dinl diab hongz ramx miz ningl，
两　脚　踩　塘　水　不　动

两脚踩水塘不动，

Diab gec jingz hauxsianl miz lons.
踩　那　把　稻谷　不　落

踩稻穗不落。

Ruangh bix saml nuangx myonh lumc dauz，
想　哥　心　妹　杇　像　青苔

想哥心朽如青苔，

Saml nuangx mbaul lumc dunh.
心　妹　轻　如　泡沫

妹心轻如泡沫。

Uns lumc byagt soongl ndaail，
嫩　如　菜　两　薅

嫩如白菜薅两道，

Uns lumc byagt saaml ndaail.
嫩　如　菜　三　薅

嫩如白菜薅三道。

Ruangh mengz daail saamlngonz ins doonh，
想　你　死　三天　连　（一）半

想你死去三天半，

Ruangh mengz lamx bail doonh xez ringz.
想　你　摔倒　去　半　时　午时

想你倒去半时辰。

Dangclaez nauz jiml miz ruangh，
怎么　说　我　不　想

怎么说我不想，

Dangclaez nauz nuangx miz ruangh.
怎么　说　妹　不　想

怎么说妹不想。

Ruangh mengz sams gec ngonz bail rih，
想　你　些　那　天　去　地里

去种地那些天想你，

Ruangh mengz sams gec ngonz bail naz.
想　你　些　那　天　去　田里

去种田那些天想你。

Bail rih riuc fahgvaz doc riuc mizndaix，
去　地里　拿　板锄　都　拿　不得

去地里拿板锄拿不得，

Qyaux fahqyas doc qyaux miz ningl.
抬　条锄　都　抬　不　动

抬条锄抬不动。

Neh dangz jiml naaisfoih，
想　到　你　瘫痪

想到你就瘫，

Neh dangz bix naaisfoih.
想　到　哥　瘫痪

想到哥就软。

Nuangx daz ndiabt dangz bix，
妹　一　想　到　兄

妹一直想到哥，

Nuangx daz ndiabt dangz mengz.
妹　一　想　到　你

妹一直想到你。

Aul fenz doc lumz head，
要　柴　都　忘记　捆

要柴忘记捆，

Gead dangz nyas dangz nyaangc mal raanz.
扛　连　杂草　连　渣　来　家

杂草扛回家。

Laaisnauz jiej xizlaanl banzbah，
以为　姐　娃娃　发疯

以为妹发疯，

Laaisnauz jiejsaaml feax banzbah.
以为　三姐　别人　发疯

以为我发疯。

Nuangx daz ndiabt dangz bix，
妹　一　想　到　哥

妹一直想到哥，

Nuangx daz ndiabt dangz mengz.
妹　一　想　到　你

妹一直想到你。

Famzfumz lamx dieh weah，
突然　摔倒　林　青冈

突然倒在青冈林，

Famzfumz lamx dieh suml.
突然　摔倒　林　化香树

突然倒在化香林。

Lamx dieh weah xiangs ndunl miz ndaix，
摔倒　林　青冈　想　站　不　得

倒在青冈林站不起，

Lamx dieh suml xiangs runs miz ndaix.
摔倒　林　化香树　想　起来　不　得

倒在化香林起不来。

Soongl dinl diab guh haaiz miz ndaix，
两　脚　踩　双　鞋　不　得

双脚穿不得鞋子，

Soongl fengz daaiz guhdeh miz ndaix.
双　手　拿　筷子　不　得

两手拿不动筷子。

Guhdeh mizlix jiclaail nagt，
筷子　没有　多少　重

筷子没有多重，

Fengz haz ragt haz doons.
手　要　断　要　断

手欲断一般。

Byaaic haanzgaanh bail mboons mizlix jiclaail jail，
走　门槛　去　房间　没有　多少　远

从门槛到房间没多远，

Neh dangz bixdalmbail xih ruangh，
想　到　情哥哥　就　忧愁

想到情哥哥就忧，

Neh dangz goysaaml feax xih ruangh.
想　到　三哥　别人　就　忧愁

想到情哥哥就愁。

男：

Goy doc ndiabt dangz nuangx，
哥　都　想　到　妹

哥也想到妹，

Goy doc ndiabt dangz menl.
哥　都　想　到　你

哥也想到你。

Weiq dangclaez xih ruangh mengz qvax？
为　什么　就　想　你　傻

为什么想你这么傻？

Weiq yianghlaez xih ruangh mengz laail？
为　啥样　就　想　你　多

为什么想你这样多？

Ruangh mengz daic gec ramxdal lail dumh mog，
想　你　哭　得　眼泪　流　淹　被子

想你我哭得眼泪湿被子，

Ramxdal dogt dumh soiz，
眼泪　落　淹　枕头

眼泪湿枕头，

Ramxdal roil dumh deenh.
眼泪　洒　淹　床铺

眼泪洒床铺。

Meeh runs roomh mal ranl，
母亲　起床　早　来　看

母亲起早来看见，

Meeh xih haaus yiangh neex，
母亲　就　问　样　这

母亲这样问，

Banzmaz daic mo leg？
为啥　哭　呢　儿子

为啥哭了儿？

Banzmaz daic mo xingl？
为啥　哭　呢　宝贝

为啥哭了幺？

Goy xih doobt sizsaanz，
哥　就　回　这样

哥就这般答，

Bix xih haanl xonz haaus.
哥　就　回　句　话

哥就这般讲。

Xeeuhgoons xeeuh weangz nyaaux，
古代　辈　皇帝　吵

古代皇帝吵，

Xeeuh neex xaaux weangz mos.
辈　这　造　皇帝　新

现代立新官。

Ramx os mbos ruiz wal，
水　出　井　印　花

井口印成花，

Yinyweiq baz feax loongh，
因为　妻子　别人　耍

因为他人妻来骗，

Yinyweiq maix feax loongh.
因为　妻子　别人　耍

因为他人妻捉弄。

Goy doc ndiabt dangz nuangx，
哥　都　想　到　妹

哥也想到妹，

Bix doc ndiabt dangz menl.
哥　也　想　到　你

哥也想到你。

Ruangh nuangx seeuc miz daail，
想　妹　差　不　死

想妹险些死，

Ruangh gvaail seeuc miz lamx，
想　你　差　不　摔倒

想你险些倒，

Ruangh mengz xeel haux lianz ramx mizgenl.
想　你　丢　饭　和　水　不吃

想你不思茶和饭。

Hocjis yeeuh miz gaangc，
朋友　喊　不　讲

朋友喊不理，

Bixnuangx yeeuh miz haanl.
兄弟　喊　不　应

亲人叫不应。

Goy xih mog gob ndaangl daicnumh，
哥　就　被子　盖　身体　哭泣

哥就躲在被里哭，

Maanl gob jauc daicnumh.
床单　盖　头　哭泣

床单盖头哭。

Bix miz deg daic rih，
哥　不　是　哭　地

哥不是哭地，

Bix miz deg daic naz.
哥　不　是　哭　田

哥不是哭田。

Leglaaiz gul daic baz laauzlih，
原来　我　哭　妻子　私有

我是怕你不能为我妻，

Gul daic maix laauzlih.
我　哭　妻子　私有

我是怕你不能为我妻。

Goy daz ndiabt dangz nuangx，
哥　一　想　到　妹

哥一想到妹，

Bix daz ndiabt dangz menl，
哥　一　想　到　你

哥一想到你，

Ruangh mengz xeel haux lianz ramx mizgenl.
想　你　丢　饭　和　水　不吃

想你不思茶和饭。

Xaglaais may mengz ndil，
幸好　妈妈　你　好

幸好你妈为人好，

Meeh mengz gueh hauxsil guoj diangz mal byogt.
母亲　你　做　爆米花　裹　糖　来　唤

你妈做糖果来唤。

Mal yeeuh dangz lac mog，
来　喊　到　下　被子

来到被子下喊，

Mal byogt dangz lac maanl.
来　唤　到　下　床单

来到床单下唤。

Nehdangz jiej xizlaanl daaus xinh，
想到　姐　娃娃　回　醒

想到你就醒，

Nehdangz jiejsaaml feax daaus xinh.
想到　三姐　别人　回　醒

想到妹就醒。

Weiq yianghlaez xih ruangh mengz qvax？
为　啥样　就　想　你　傻

为什么想你这么多？

Weiq yianghlaez xih ruangh mengz laail？
为　啥样　就　想　你　多

为什么想妹这么深？

Ruangh mengz seeuc miz daail，
你　想　差　不　死

想你险些死，

Ruangh gvaail seeuc miz lamx.
想　妹　差　不　摔倒

想你险些倒。

Seeuc miz lamx nac hoongl，
差　不　摔倒　前　活

险些摔地里，

Seeuc miz goongl ronl mengz bail rih，
差　不　倒　路　你　去　地

险些倒路边，

Seeuc miz goongl ronl nuangx bail rih.
差　不　倒　路　妹　去　地

险些倒在半路上。

女：

Nuangx daz ndiabt dangz bix，
妹　一　想　到　哥

妹一想到哥，

Nuangx daz ndiabt dangz mengz.
妹　一　想　到　你

妹一想到你。

Ninz xih xel miz deeus，
睡　就　气　不　喘

睡觉不喘气，

Xel miz deeus lac mog，
气　不　喘　下　被子

被里不喘气，

Xel miz deeus lac maanl.
气　不　喘　下　床单

床上不呼吸。

Miz ndaix goy gueh gvaanl xih ruangh，
不　得　哥　做　丈夫　就　忧愁

不得你做丈夫就伤心，

Miz ndaix bix gueh jaauc xih ruangh.
不　得　哥　做　丈夫　就　忧愁

不得哥做丈夫就伤心。

Ndianl ndeeul ruangh saamlxib ngonz xos gogt，
月　一　愁　三十　天　放　头

一个月三十天在前，

Soongl ndianl rogtxib ngonz xos byaail.
两　月　六十　天　放　尾

两个月六十天续后。

Ruangh laail banz daail daaus，
想　多　成　死　回

想多就像已死去，

Bas haaus dungx lix jaiz.
嘴　话　肚　还　想

嘴说心里想。

Nauz dangz bixdalmbail mizxieh，
说　到　情哥哥　不信

说来哥不信，

Goysaaml feax mizxieh.
三哥　别人　不信

说来你不信。

Laaul mengz yueh nuangx aul sil ruangx gueh bangz，
怕　你　骗　妹　要　丝野芭蕉　做　布

怕你骗我拿野芭蕉丝做布，

Lanz sil gvaaul gueh riabt.
搓　丝　蜘蛛　做　蚊帐

搓蜘蛛丝做蚊帐。

Riabt miz hal nyungh nyumx，
蚊帐　不　配　别　染

蚊帐不配就别染，

Miz degdungx nyungh laanz.
不　合意　别　拦

不合意就别拦。

Mianjdef laaus meeuz raanz soongl baaih，
免得　耽搁　季节　家　两　边

免得错过成家好时节，

Wuq meeuz eeux soongl baaih.
误　季节　仓　两　边

错过双方成家好时光。

男：

Ruangh mengz goy xih ximl bail baaih beanglmauc，
想念　你　哥　就　看　去　边　东方

想你哥就看东边，

Gauc bail baaih beanglxiz.
看　去　边　东南方

想你就看东南边。

Mizranl gol faix laez bil jaangl jis，
不见　棵　树　哪　摆动　中间　枝

不见有枝在树中摆，

Ruangh nuangxjis bix xih daic xuangs yingl.
想念　情妹　哥　就　哭　放　声

想情妹哥就放声哭。

Ingl dul lauz daicnumh，
靠　门　楼　哭泣

靠着房门哭，

Ingl dullaaux daicnumh.
靠　大门　哭泣

靠着大门哭。

Ramxdal dumh jis faix，
泪水　淹　几多　树

泪水淹了多少树，

Ramxdal dumh jis wal，
泪水　淹　几多　花

泪水淋湿多少花，

Baais gol haz bail dauc dieh lings.
如　棵　茅草　去　长　丛　陡

像根茅草长陡坡。

Beeh goy daic aul ingx，
虽　哥　哭　要　影

哥哭着要见影，

Beeh goy daic aul mengz.
虽　哥　哭　要　你

哥哭着要见妹。

Hamz gec faangz genzmbenl miz gungh，
气　那　鬼　天上　不　许

恨上天神灵不允许，

Sianl genz jauc miz gungh，
仙　上　头　不　许

神仙在上不允许，

Mbaux miz gungh xih gungz.
不　不　许　就　无法

不允许就无法。

Mbaux miz zunj gej gul aul mengz xih ruangh，
不　不　准　给　我　要　你　就　忧愁

不让我娶你就忧，

Mbaux miz zunj gej gul aul nuangx xih ruangh.
不　不　准　给　我　要　妹　就　忧愁

不让我娶妹就愁。

女：

Bix a，
哥啊

哥啊，

Bas xih nauz ruangh nuangx，
嘴　（助）　说　思念　妹

嘴里说想妹，

Bas xih nauz ruangh gul.
嘴　（助）　说　思念　我

嘴里说想我。

Laaul mengz ruangh bux genz deel qvax，
怕　你　思念　个　上　那　傻

怕你想别人想得傻，

Laaul mengz ruangh bux lac deel laail.
怕　你　思念　个　下　那　多

怕你想别人想得多。

Mal nauz gvaail el xoh，
来　说　我　背　名

来叫我背名，

Mal nauz nuangx el xoh.
来　说　妹　背　名

来让妹背名。

Ndees mengz ruangh gec bux dangclaez？
不知　你　牵挂　那　个　什么

不知你牵挂谁？

Dianl mal rauz dez xoh，
说　来　咱　带　名

说给我背名，

Nauz mal nuangx el xoh.
说　来　妹　背　名

说给妹背名。

男：

Nuangx a，
妹啊

妹啊，

Ruangh mengz bix xih deems jeexsadt haanghlauc，
思念　你　哥　就　等　西北集市　酒摊

思念你哥就到场坝酒摊等，

Deems jeexmauc haanghbangz.
等　东方集市　布摊

在场坝东边卖布摊上等。

Deems duez nuangx miz dangz，
等待　个　妹　不　到

等妹等不到，

Gul xih dauc seenglsanz ngonzhamh，
我　就　生　发冷发热　日夜

我日夜忽冷又忽热，

Banz seengl laaux ngonzhamh.
成　发砂　大　日夜

日夜生大病。

Goy ye haz dangs buxndil laaul lox，
哥　也　打算　告知　富人　怕　骗

稍话给富人又怕骗，

Neh haz dangs buxhoc laaul lumz.
想　打算　告知　穷人　怕　忘

稍话给穷人又怕忘。

Bins ranl mengz seeuc ruangh，
直　见　你　少　忧愁

直到见你才开心，

Bins ranl nuangx reeuc ruangh.
直　见　妹　少　忧愁

直到见妹才不愁。

Mingh nuangx ndil waanz ndil，
命　妹　好　又　好

妹的命好又好，

Dogt jaangl fiz doc xamx.
落　中间　火　都　凉

落火中也凉快。

Mingh bix qyas waanz qyas，
命　哥　苦　又　苦

哥的命苦又苦，

Dogt jaangl ramx ye roz.
落　中间　水　也　枯

落在水中也枯萎。

Dauc banz gol daaus naaih，
长　成　棵　回　慢

成活也长得慢，

Mingh bix haais ndaangl bix miz ndil.
命　哥　害　身　哥　不　好

哥命不好命害身。

Ndiabt miz ndil faanhbingh，
想　不　好　生病

陷入苦思易生病，

Baaisbux qyus duldaangs.
好像　在　窗子

好比在窗边思念。

Ndaangl bail ringx biangh reeuz，
身　去　滚　坝　碎炭

身在碎炭上滚，

Baaisbux jisfaix yeeul xamh gons.
好像　树枝　生　附　桩

好比树枝附树桩。

Mingh goy baais duezromh duh xaz，
命　哥　如　老鹰　站　丛

哥命如老鹰站草丛，

Baais duezal bail fag roongz bius.
如　乌鸦　去　孵　巢　无

如乌鸦孵蛋却无巢。

Al gah fag gah fauz，
乌鸦　独自　孵　独自　蹲

乌鸦孵蛋独自蹲，

Nagtmbaul miz ndaix duh.
轻重　不　得　站

怎么也不能站。

Baais gec ramx gveeucluh miz mbuml，
如　那　水　漩涡　不　转

好比那漩涡水不转，

Baais gec jiml jaangl mbos.
如　那　针　中间　井

好比那针在井中间。

Jiml jaangl mbos lix xamx，
针　中间　井　有　凉

针在井中针凉爽 ^[1] ，

Ramx jaangl mbos lix lail.
水　中间　井　有　流

水在井中水自流。

Mengz ruangh mengz lix boh mengz bail guehbeans genl mac，
你　忧虑　你　有　父　你　去　经商　吃　长

你愁有你父去经商，

Mengz ruangh mengz lix bix mengz bail guehgax xiangx raanz，
你　愁虑　你　有　哥　你　去　做生意　养　家

你愁有你哥做生意，

Lix bux aanl haail naz lianz rih.
有　个（人）　打算　开　田　和　地

有人打算开田和地。

Xibsis dungx xibsis，
十四　同　十四

十四同十四，

Xibhac dungx xibhac.
十五　同　十五

十五同十五。

Xibsis menl banz eeux，
十四　你　成　家

十四你成家，

Xibhac nuangx banz raanz.
十五　妹　成　家

十五妹成家。

Mengz miz mbaanl lumc goy，
你　不　烦恼　像　哥

不像哥那样愁，

Menl miz uangx lumc goy.
你　不　忧愁　像　哥

不像哥那样忧。

Goy ye saaml sis fih banz eeux，
哥　也　三　四　未　成　家

哥三十四岁未成家，

Saaml hac mbaux fih banz genl.
三　五　没有　未　成　吃

三十五岁无家业。

Goy xac mengz bins meanh，
哥　等　你　至　今

哥等你至今，

Gul xac nuangx bins meanh.
我　等　妹　至　今

我等妹至今。

女：

Bix ya，
哥啊

哥啊，

Xinl raaix miz ximl raaix？
是　真的　不　是　真的

是真还是假？

Xinl xih ndaaix saaml soml dez dac，
真　就　麻　三　庹　带　打

是真用三庹麻来打，

Ndaaix hac soml dez dingh.
麻　五　庹　带　定

五庹麻线来定。

Xil xih mal rauz bailraanz mbagt haanzramx，
真　就　来　咱　回家　砍　挑水的扁担

真的我们就回家砍扁担，

Bailraanz ramc gal deh.
回家　砍　只　筷

回家砍筷子。

Ramc gal deh gueh soongl，
砍　只　筷　做　两

砍筷子成双，

Ramc gal deh gueh saaml.
砍　只　筷　做　三

砍筷子成三。

Mal rauz waanl bas nganz gueh feangh，
来　咱　斧头　劈　银　做　半

用斧头劈下银两半，

Feangh bix aul xos longx waljub，
半　哥　要　放　篮　花

一半放哥花篮里，

Feangh nuangx aul xos rug wallaanz.
半　妹　要　放　屋　兰花

一半放妹兰花屋。

Naanz xih mbenl rox zunj，
久　就　天　会　准

久了天会允，

Naanz xih weac rox yungz.
久　就　云　会　许

久了云会许。

Deengl yah mengz ngonzliangh，
是　妻　你　哪天

最终会有一天为你妻，

Deengl yah bix ngonzliangh.
是　妻　哥　哪天

最终有一天为阿哥妻。

Isnauz mbenl miz zunj，
如果　天　不　准

如果天不允，

Isnauz weac miz yungz，
如果　云　不　许

如果云不许，

Nuangx xunz ndoil doonh doh，
妹　玩　空　段　一

妹空玩一段，

Gul xunz ndax doonh doh.
我　玩　白　段　一

我白玩一段。